اعمل دماغ نايس

بسم الله الرحمن الرحيم



معملتش (دماغ ) قبل كده ؟ ..



بس المرة دى مش اي دماغ دي اسمها


( دمــــــــاغ نـــايس )

ايـــــه دماغ ناس دى ..؟؟
- دماغ ناس .. زى دماغ قهوه.. دماغ لب وسودانى.. تعمل دماغ " ناس"..ازاى؟؟


بص ياسيدى ..

لو فى يوم لقيت نفسك متضايق ومخنوق وملكش نفس تكلّم حد ومش لاقى حاجه تعملها ..
إنزل الشارع إتمشى لواحدك و تأمّل فى الناس ..

هتلاقى الموضوع مسلّى جداَ ..

الشعب المصرى ده لذيذ طحن .. ههههههههه

......


* هتلاقى ناس طالع عيننهم فى أتوبيس فيه 186 واحد والناس طالعين من الشبابيك والجو حر ..

والناس لسّه بتركب وهى مبتسمه وحاسه بالكفاح ..


وتلاقى واحده ست تخينه – غالباَ موظفة – دخلت وسط الـ 120 واحد اللى واقفين على الباب واخترقت الجموع

فى براعة ورشاقة تحسد عليها ..
سبحان الله

* بنت لابسه هدوم المدرسة ومزوغة ماشيه مع ولد

– ممكن تحلف إنه مش هيلاقى شغل ولا بعد 100 سنه من شكله –

وإن لقى.. أول حاجه هيعملها أنه يسيب البنت دى ..

كفايه فقر بقى ..
* واحد ومراته - كبار فى السن – ماشيين على الكورنيش بياكلوا ترمس فى منتهى السعادة والأمتنان ومش

عايزين حاجه تانيه من الدنيا ..



* واحد شكله تعبان طحن ومش لاقى ياكل، بس جايب أحدث " الموبايل " وبيتكلم فيه بصوت عالى فى وسط

الشارع..


عشان هو حر ..




* واحد عمره ما شاف الزبدة فى حياته ولا يعرف بتستخدم فى أيه أساساَ ..

عاملين معاه لقاء فى القناة الثالثة بيسألوه عن رأيه في مقاطعه المنتجات الدنماركية ..

قلهم

أه طبعاَ انا مع المقاطعه دا واجب وطنى يا جماعه أنتوا بتتكلموا إزاى .. "



* واحد واقف مع خطيبته/صحبته قدام قفص الأسود فى جنينه الحيوانات

بيقولها : " بصى .. أهو ده بقى أسد .. !!! "

شاعراَ بأنه قد منحها العلم والمعرفه المطلقة وأسرار الكون ..



* بنات بكرش لابسه بديهات ستومك..عشان دى الموضه ..



* أسره مكونه من 4 أفراد أب وأم وبنت شابه وولد فى أعدادى قاعدين فى Café .. طلبوا عصاير

وشيشتين .. مين اللى شرب الشيش ؟! .. البنت وأمها ..حاجه تغيظ... !!






جرب أنت كمان تعمل دماغ نايس ..

هتلاقى الموضوع مسلّى جداَ .. و أبقى قلنا إيه رأيك